Кире против Филип Лазаров, Барса против Вардар во Скопје

Стартот на новото издание на Лигата на шампионите, преполно со симболика за македонскиот ракомет и за Кирил Лазаров. За прв пат во кариерата нема да биде домаќин во СЦ „Борис Трајковски„ во Скопје и за прв пат во Лигата на шампионите ќе игра против неговиот брат Филип.

Двајцата играа еден против друг во унгарскиот шампионат, кога Кирил го носеше дресот на Веспрем, а Филип на Татабања. Барса до сега четири пати гостувала во Македонија и секогаш победувала. Во сезоната 2003/04 каталонците славеа со 27:35, наредната сезона со 12:26 а во 2010/11 нов триумф од 28:35. Меѓу тие мечеви следеше и гостувањето во нашиот главен град и против Металург. Во сезоната 2008/09, Барселона го доби Металург со 22:29.

Ова е само прво од двете гостувања во Скопје во Б групата оваа сезона за избраниците на Пасквал. Тие со чартер лет веќе пристигнаа во Македонија и нема да тренираат вечерва, туку во хотелот Александар Палас од 19:00 часот ќе имаат средба со новинарите. Утре по мечот делегацијата на Барселона се враќа за Каталонија.