ФОТО + ВИДЕО: Лазаров позираше во дресот на Барселона со број 77

Според најавите денес на пладне во конференциската сала во „Палау Блауграна„ во Барселона, најдобриот македонски ракометар Кирил Лазаров прв пат позираше во дресот на Барселона со бројот 77.

Неполни две недели од официјализацијата на трансферот од конкурентниот Атлетико Мадрид, леворакиот бомбардер за прв пат говореше за шпанските медиуми. Голем беше интересот на домашната ракометна јавност за второто засилување во летниот преоден рок по Никола Карабатиќ. Во друштво на тренерот и менаџерот на екипата Хавиер Пасквал и спортскиот директор за секцијата ракомет, футсал и хокеј О Калахан, нашиот Лазаров неполн час ќе одговара на прашања на седмата сила. По промоцијата во неговиот нов клуб, Лазаров и денешниот ден ќе го мине во Барселона со запознавање на проектот, новиот дом, а од утре пак е во Македонија и започнува неговиот летен одмор. Стартот на подготовките за сезоната 2013/14 Лазаров и другарите ќе го имаат на 5 август.