Лазаров на ручек во Радио Марка
Во пресрет на последниот домашен натпревар во сезоната, македонскиот репрезентативен капитен Кирил Лазаров беше гостин во мадридското Радио Марка. Тој повеќе од еден час разговараше на актуелни теми со шпанскиот новинар Хорхе Дармиел, а потоа имаа и заеднички ручек.
Ова искуство не му е непознато на Лазаров, кој веќе гостувал во Радио Марка кога го продолжи договорот со Атлетико Мадрид. Сега гостуваше кога го најави своето заминување од главниот град. Сезоната во дресот на Атлетико, овие три години минати во Шпанија и ASOBAL лигата беа главна тема на разговорот.
Хорхе Дармиел е бивш ракометар и добар познавач на ракометната игра, а воедно работи за Радио Марка и за електронското издание на најтиражниот шпански весник. Во неговата колекција на дресови неизбежна е и седумката на македонскиот национален дрес.