Лазаров погодуваше без промашување, Нант со седма победа во шампионатот
Истрес - Нант 32:35 (16:21)
Нант останува максимален и по седум кола во францускиот шампионат, откако го совлада Истрес во гости со три гола разлика. Уште една одлична партија демонстрираше Кирил Лазаров, кој ја потврди својата одлична форма и одигра клучна улога во нов триумф на својата екипа.
По изедначениот почеток, во финишот на првиот дел ракометарите на Нант резултатски се одлепија и на одмор заминаа со позитива од +5 . Во продолжение тимот на Кирил Лазаров само рутински ја чуваше предноста и на крајот сосема заслужено славеше нова победа.
Капитенот на македонската репрезентација постигна пет погодоци од исто толку обиди во меч во кој избраниците на Тјери Анти доминираа од првата до последната минута. Лазаров сите пет гола ги постигна со удари од девет метри, а седмерците ги реализираше Шпанецот Ривера. Кај Нант најефикасен беше кружниот напаѓач. Турнат со девет погодоци, а четири пати прецизен беше Еспен Ли Хансен.
Во следното 8. коло на 7 ноември, Нант ќе се сретне со единствената останата максимална екипа во Франција, Шамбери.