Претставени Бараше, Масач и Ферер
Од почетокот на оваа недела, Атлетико Мадрид со комплетниот свој ростер се подготвува за првите предизвици во новата сезона: IHF Супер глобе и Суперкупот на Шпанија. Освојувачите на медали на Олимписките игри во Лондон од понеделникот тренираат со Лазаров и сограчите. Денес од 12:30 на стадионот „Висенте Калдерон„ каде беше официјализирано и продолжувањето на договорот на нашиот Лазаров во март, беа претставени Ксавиер Бараше, Јосеп Масач и Алваро Ферер.
„Дојдов во Мадрид да станам европски првак, бидејќи со мојот поранешен клуб Шамбери, никогаш не го минавме четвртфинале„ беше јасен францускиот освојувач на златото од Лондон, истакнувајќи дека е среќен што ќе тренира под водство на легендарниот Талант Душебаев.
„Не чувствувам притисок. Абало е незаменлив, бидејќи е најдобро десно крило во светот, но ќе се обидам да му помогнам на екипата„ беа првите зборови на Масач кој дојде од Арагон.
„Дојдов во најсилната екипа на светот и ова е максимумот што секој ракометар може да го посака„ се претстави бившиот ракометер на Грањолерс и Адемар Леон, Алваро Ферер.
Тројцата по претставувањето позираа на фудбалскиот стадион на Атлетико со своите нови дресови. Бараше го доби дресот со број 19, Ферер ќе ја има 8, а Масач ќе го носи дресот со број 27. Прв пат мадридската публика ќе ги види на 8 септември кога во главниот град се игра Супер-купот на Шпанија помеѓу Атлетико Мадрид и Барселона. Од денес обелоденета е сатницата - 18:00 часот со ТВ покриеност низ Шпанија и во светот.
