Полска со победа по продолжение стигна до бронзата
Не беше лесно да се пронајдат мотиви во мечот за бронзениот медал само два дена по поразите на Полска и Шпанија во мечевите од полуфиналето. Момците на Биглер заради цврстата одбрана подобро го отворија мечот и преку кружниот напаѓач Сипрзак поведоа со 3:0. Каденас веднаш побара тајм-аут и се обиде да ја „размрда„ екипата. Дури во осмата минута „црвената фурија„ го постигна првиот гол преку Рокас.
Внесувањето на Антонио Гарсија донесе нова хемија во шпанскиот состав и полека се топеше полската предност. Во 23 минута токму Гарсија погоди за 11:11 и мечот влезе во егал ритам. Така со 13:13 се отиде на одмор, а Полска пак остави впечаток дека и покрај подоброто полувреме, не стекна предност по 30 минути. На почетокот на второто полувреме, Шпанија ги превзеде работите во свои раце и Томас и Раул Ентрериос со брзи голови го принудија Биглер на тајм-аут уште во 32 минута. Полека но сигурно момците на Каденас ја зголелуваа предноста.
Гонзало бранеше подобро од Шмал и во 48 минута, шпанците заминаа на 18:22. Тогаш се чинеше дека се е готово. Но полските ракометари веруваа и преку Јурецки и Зиба полека ја топеа предноста. При 23:24 за Шпанија, Македа ја погоди стативата, а со звукот на сирената гол постигна Зиба и го внесе мечот во продолжение со 24:24. Психолошката предност сега беше на страната на полската репрезентација, која со Сипрзак како додадена вредност постојано беше во водство. По 26:26 на крајот од првото продолжение, момците на Биглер преку 2.06 високиот кружен напаѓач поведоа со 29:28 на 30 секунди до крајот. Шпанците не упатија ниту удар кон голот на Шмал и како големо изненадување, Полска го освои бронзениот медал. Финални 29:28 за полскиот национален тим во кој џокер беше Зиба со 8 постигнати гол, а Сипрзак кога најмногу требаше, во продолженијата беше незадржлив. Вкупно постигна 6 гола. Кај Шпанија Виктор Томас со 7 и Валеро Ривера јуниор со 5 гола беа најефикасни, но надворешната линија, посебно леваците потфрлија. Светскиот првак од пред две години остана без медал на мундијалот во Катар, а Полска по четврт пат освојува медал од мундијалите по среброто во Германија 2007 и бронзите во 1982 и 2009 година.
Комплетниот извештај од натпреварот можете да го погледнете ТУКА: